广东人钟意饮茶，呢种“钟意”，根本唔可以用文字语言形容！三五知己、亲戚朋友相约茶楼，谈天说地，品尝美食，已经成为部分广东人嘅日常。

茶楼嘅从容同安详、知己嘅谈天同说地、再配上一壶观音或普洱，当然唔少得嗰“一盅几味”！

毕竟饮茶，“饮”唔系重点，“食”先系重点！今日同大家吹一吹嗰“一盅几味”里面嘅“四大天王”！

有一句俗语话：饮啖茶，食个包。呢个包指嘅就系广式叉烧包。一代天后徐小凤都有首名曲，就叫《叉烧包》！

叉烧包嘅由来，依家已经难以考证，但无可否认嘅系，馒头、包子传入岭南之后，经过长时间融入岭南元素，先做成今时今日地地道道嘅叉烧包。

咁叉烧包作为一种最普通不过嘅包，点解会咁出名？

佢既可以登上大雅之堂，又可以身处街边角落。但最主要嘅原因系：我哋都钟情呢种味道！

当时在茶楼一听到‘叉烧包，糯米鸡’就会很兴奋，记得当时有个大叔托着一个木托盘，木托盘有一个布吊带，他就用肚腩顶着木托盘，扛着叉烧包出来。一出来，可能走不了十步八步，叉烧包就会被抢光。”

15年，一家餐饮企业为“叉烧包之作技艺”申遗，暂且不论成功与否，但我本人并唔希望申遗成功，因为我并唔想叉烧包成为一种“逝去的味道”！

作为一种早、午、晚餐、下午茶、宵夜、零食都可以担当嘅蛋挞，相信唔少人都从细食到大，食到依家，而且仲会一直食落去。

中世纪，英国人就已经用奶、糖、鸡蛋制作类似蛋挞嘅食物；17世纪，蛋挞成为咗满汉全席里面嘅一道菜式。

唔少人认为，蛋挞系由香港传入广东，但系根据香港历史学者吴昊考证，1920年左右，蛋挞就出现喺广州，然后随之改良成“广式蛋挞”。（传统广式蛋挞，其实叫“蛋砵”）而1940年左右先喺香港出现。

整咗几十年蛋挞嘅何世晃师傅话：“蛋挞在粤式茶点中占有很重要的位置，要想吃到国内最好的蛋挞，必须要来广州才行。”可见广式蛋挞嘅地位！

见到“干蒸烧卖”，一定有好多人忍唔住想问“究竟系叫干蒸？定叫烧卖？”老老实实，我一样都咁头晕！

同云吞一样，干蒸烧卖都系由北方传到岭南，经过改良融合之后嘅点心，对于佢嘅由来，说法有好多，多到无从考究。

老一辈嘅爷爷级朋友，佢哋嘅见解可能并唔权威，但好有意思：

旧时（建国初期）好穷，食肉系一件好奢侈嘅事，虾饺、云吞呢啲都系高档嘢！有一啲茶楼就好创新，将点心里面嘅肉馅换成木耳、粉丝、糯米等等，有唔同配搭同口味。

干蒸烧卖因为唔封口，人人都睇到系咩馅，所以就特别好卖！所以以前茶楼嗰啲点心车，放得最多嘅就系干蒸烧卖，部点心车一边着住火，烧水蒸点心，一边推车去卖，咁咪“干蒸烧卖”咯！

PS：“爷爷”意见，仅供参考。

其实冇必要对干蒸烧卖过多研究，食落肚嘅并唔系历史，而系干蒸烧卖嘅味道、喜爱、情怀。

虾饺被誉为“广东四大名点之首”，百年历史依然久盛不衰。

相传二十世纪二三十年代，广州市河南区伍村伍凤乡，一间小茶楼发明咗虾饺，佢哋用新鲜捉嘅河虾，配上猪肉、鲜笋制作而成。但当时肉非常贵，所以虾饺并唔系人人都食得起。所以就有句俗话“虾饺当食晏”。

皮，晶莹通透、软韧适中；

馅，料鲜味浓、鲜美可口。

今时今日，经过多年嘅改良，加上百姓日渐富裕，虾饺几乎成为饮茶必点嘅点心之一。回想起童年跟老窦去茶楼，第一次食虾饺嗰个场景，就算过咗十几年后都恍如昨日，原来“一见钟情”唔止可以用系人身上！

有唔少朋友都觉得：可能就系因为依家想食好容易，所以反而觉得冇以前细个嗰时咁好食。就好似我阿妈同我讲过“间中咸鱼，好过日日鲍鱼”！其中嘅意思，可能就系咁挂。

广东嘅名点，点止单单四种？仲有排骨、凤爪、支竹牛肉、粉果、糯米鸡等等等等。

【来源】羊城网