方言是地方语言文化瑰宝

白话就是广东一大特色方言

风行全省

近期，厚街文学爱好者王婉芳就用白话创作了《阿妈喊你返屋企食饭》一文，用白话读起来朗朗上口，够特色、接地气，在朋友圈中广为传播。

今天，小编全文转发，看看是否会引起你的共鸣。

阿妈喊你返屋企食饭

■王婉芳/文

我阿爸阿妈年纪老嘞，佢哋平日最钟意灌溉打理下啲花花草草，就好似多年前佢哋用亲情默默守护啲仔女，希望我哋嘅生命之树翠绿茂盛。到咗仔女大个咗各自成家嘞，佢哋最大嘅心愿，就系守望盼着我哋喺百忙之中抽时间“常回家看看”，每次儿孙满堂坐埋一齐食饭，佢哋都不知几开心啊。

几十年一眨眼就过去嘞。记得我细个嗰阵，好贪玩。旧阵时农村嘅哗鬼咁大群咁大，同村啲细蚊仔好钟意成班一齐玩噶，去呢度去嗰度啊噉，譬如去河涌度捉鱼蟆虾公，去山头度摘蛇泡山埝。最常去嘅地方就系村门前嘅地堂。呢度除咗农忙时节晒谷之外，平时我同啲死党就好经常喺度学踩单车、弹玻珠、跳橡筋同玩泥沙，玩得最过瘾最开心嘅游戏当然就系仆匿匿捉迷藏，同埋麻鹰捉鸡仔啦。

我哋成班哗鬼有时玩到嘻嘻哈哈癫晒，连老窦姓乜都唔知。好多时玩到唔知咩时候，通常就会见到隔篱屋嗰个得两岁嘅细佬走到地堂边，对住佢大哥嗲声嗲气噉嗌：“多多（哥哥），阿妈喊你返屋企食饭！”一听到呢个精灵“探子”报信，玩得几咁兴起都要自动自觉散伙嘎啦。班马骝仔几百厌都好啦，个个至听自己阿妈话噶，如果做紧鸡仔被麻鹰捉住嘞喔，就乘机话：“食饭紧要，等阵再畀你捉过啦”，做麻鹰嗰个就对着啲扯住衫尾嘅鸡仔话：“唔使匿嘞，够钟食饭”，因为通常食饭都好准时喺中午12点同晚黑6点噶，习惯咗扭开收音机听张悦楷讲古仔嘎嘛，所以，最大嗰个姐姐就会大声嗌：“返屋企听曹操、刘备啰！”于是乎，一哄而散，个个走得快好世界、走得摸冇鼻哥，好似支箭噉冲返屋企咯。走翻最后嗰个，有时又会整蛊一下啲“大头虾”，专登嗌：“阿边个，漏咗对鞋唔要啊？”其实，嗰阵时个个习惯咗打大赤脚噶，如果边个真系以为自己着咗鞋出嚟返转头揾，噉就中计畀人笑啦。

嗰阵时，家家户户啲烟囱冒烟嘅时候，细蚊仔总系识得回家帮忙做家务准备食饭嘎。就算啲顽童玩到忘晒形失晒晕唔记得咗，隔篱邻舍啲兄弟姊妹嗰句最熟悉不过嘅“阿妈喊你返屋企食饭”总系及时提醒我哋“迷途知返”，及早赶返屋企有滋有味噉叹我哋啲粗茶淡饭噶。只系随意嘅一声声呼唤，就牵动着我哋每一颗幼小嘅心灵，回家——开饭，噉样嘅指引陪伴着我哋成长，叫我哋时不时惗起家嘅温暖，惗起阿妈嘅味道。

咁多年来，无论尝遍各种各样嘅美味美食，我始终最难忘最钟意嘅，仲系阿妈嘅味道。就算系最简单嘅头菜肉饼、香葱蛋面，最地道嘅厚街特色菜式，嗰种围炉而坐煎煎炒炒，厨房飘溢出嚟嘅扑鼻清香，嗰种食过齿颊留香嘅感觉永远刻骨难忘；嗰种我食到狼吞虎咽风卷残云，阿妈笑到见牙唔见眼嘅情形永远记忆犹新，就算而家偶然发梦见到，都会流晒口水嘎。

世上最美味嘅莫过于阿妈煮嘅餸菜。因为阿妈用心煮出嚟嘅饭菜系带着旁人无法复制嘅亲情密码，你细个食过乜嘢，呢个印象就根深蒂固深深噉烙刻喺你脑中，永远系最好最亲切最难忘嘅。阿妈嘅味道就系家嘅味道，总系最温馨、最感动、最令人牵挂嘅。

人生不过匆匆几十年，亲情系有今生冇来世嘅，友情系可遇不可求嘅，所以，万家灯火同乡村炊烟，时不时可以唤醒我哋每一个人要不忘初心、不忘情怀，好好珍惜眼前拥有嘅平凡嘅幸福。就好似晋朝陶渊明《归园田居》当中写嘅“羁鸟恋旧林，池鱼思故渊”，“羁鸟”同“池鱼”尚且思乡，我哋无论喺边度漂泊、喺边度创业，都要记住远离物质社会嘅浮华，回到最初嘅精神家园，守住当初清亮如初嘅眼眸，守住明净与淳朴嘅内心。

各位为人子女者，请好好珍惜“阿妈喊你返屋企食饭”嘅幸福，有时间经常回家陪下父母啦，爸妈嘅快乐就系我哋最大嘅幸福。

编辑：陈直

版式：王小缘